Сирамаштијата, задолженоста на граѓаните, кредитите, неисплатените сметки за струја, ова се причините поради кои граѓаните најчесто си го продаваат семејниот златен накит.
Откупувачниците на злато никнуваат како печурки во сиромашните земји од Балканот, а во последно време и во Македонија. На улиците, особено во централното градско подрачје постојано се појавуваат нови дуќани во кои се откупува злато и сребро.
Во Македонија не е законски регулиран откупот на златото, па фирмите добиваат само дозвола за извоз велат за НОВА во Министерството за економија. Тоа овозможува на едноствен начин секој кој сака да регистрира фирма која ќе откупува злато и други благородни метали.
Трендот на забрзано отварање на вакви фирми распоредени на стотици различни локации за откуп започна во Србија и во БИХ, а продолжи во Македонија. Сопствениците се хрватски државјани, а златото што го откупуваат од граѓаните го извезуваат во Австрија и Италија. Како што информираше НОВА вчера, набргу по отварањето фирмата „Голд Ексчејнџ“, таинствено исчезна од Македонија, а на вработените им остана должна по две плати. Истото сценарио оваа фирма го направи и во Србија и во БИХ.
Уште една хрватска фирма откупува злато, а свои откупни места има во Скопје и Тетово. Управителот на фирмата за Македонија, во телефонски разговор изјави дека сопственикот не дозволува да се даваат изјави за јавност.
Според Илир Шабани од Министерството за економија, причината за појавата на овие фирми е желбата за брза заработка во сиромашните земји каде претпоставуваат дека граѓаните лесно ќе си го продаваат семејниот накит, притиснати под немаштијата.