Со повеќе културни, хуманитарни манифестации денеска ќе биде одбележан 13 Ноември – Денот на ослободувањето на Скопје.
По тој повод, градоначалникот Петре Шилегов ќе се сретне со претставници на Градскиот одбор на Сојузот на борци од Народноослободителната антифашистичка војна на Македонија.
Потоа, делегација на Собранието на Република Македонија и на Град Скопје ќе положи цвеќе пред Споменикот на ослободителите на Скопје на Партизанските гробишта и пред споменикот на генерал Михајло Апостолски на Градските гробишта „Бутел“.
Во 12:30 часот, пред Споменикот на ослободителите на Скопје, на платото пред Владата, државни делегации, борци од НОВ, претставници од Армијата на Република Македонија, од општините на Град Скопје, членови на други институции, како и официјалната делегација од Град Скопје ќе положат цвеќиња.
Традиционалната крводарителска акција на Црвениот крст на Град Скопје ќе се одржува денеска од 9 до 17 часот во Домот на хуманитарни организации „Даре Џамбаз“.
Во Детдкиот културен центар Карпош ќе се одржи манифестацијата „Го градам мојот град“, манифестација посветена на предучилишните установи, додека во книжарницата „Литература“ ќе биде промовирана монографијата „Архитектурата како фотографска скулптура (1963-1990)“ од Ерина Богоева.
Во Македонската филхармонија во 20 часот ќе биде свеченото доделување на наградите „13 Ноември“ и концерт на Македонската филхармонија.
Во МКЦ во рамки на Синдејес е „The Mauskovic Dance Band“. Влезот е слободен.
Кои се добитниците на наградите „13 Ноември“
Од областа науката добитник е Маргарита Цаца Николовска, судија, за придонес во унапредување, промоција и заштита на човековите права и слободи, развој на демократијата и владеење на правото, од образованието и воспитанието Аџи Фида, професор во пензија, од областа на спортот Андреј Стојановски, пливач, за остварување врвни резултати во пливачкиот спорт во категоријата за лица со посебни потреби, од областа на културата добитници се Марко Коловски, музиколог и Ресул Шабани писател и книжевен преведувач, за превод на Антологиите „Поети академици“ и „Поети и раскажувачи академици“, од областа на уметноста Рамадан Шукри, академски музичар, за придонес во областа на уметноста, културата, образованието и воспитанието, од областа на публицистиката Сефер Тахири, новинар, за 20-годишен придонес во развојот на новинарството и публицистиката и од областа на архитектурата Даница Павловска- Циги, архитект, за долгогодишна посветеност за зачувување на автентичноста и вредностите на градот Скопје во сферата на планирање и управување со просторот.
Добитници на „13 Ноември“ се и правните лица ЈЗУ Геронтолошки завод и Противпожарната бригада на Град Скопје, за успешна работа и голем придонес во заштитата и спасувањето на граѓаните од пожари, природни непогоди и други несреќи.
Во категоријата ученици и студенти, добитници се Арда Мустафоглу, ученик во ДМБУЦ „Илија Николовски- Луј“, за континуирани успешни постигнувања во наставните и воннаставните активности и посебен придонес за афирмација на градот Скопје во светот, Мила Коцевска, Софија Стојменова, Нена Гиевска, Марија Гавриловиќ, Петар Тодоровски и Ведран Лауренчиќ, ученици во ООУ „Кочо Рацин“- Скопје, за хуманост-укажување прва помош на лице во градски автобус.
Наградата „13 Ноември“ на Град Скопје се доделува на физички и правни лица како знак на признание на Градот Скопје за остварувања во стопанството, науката, уметноста, културата, воспитанието и образованието, здравствената и социјалната заштита, спортот и физичка култура, техничката култура, заштитата и унапредувањето на животната средина и природата, како и во други сегменти на животот, трудот и творештвото, што претставуваат посебен придонес за развојот на градот Скопје и за неговиот севкупен напредок и афирмација во Република Македонија и во светот. Наградата може да се додели и на физички и правни лица од други држави кои оствариле посебен придонес за Градот. Исто така, Наградата се доделува и на ученици и студенти за творечки труд или континуирани успешни постигнувања во наставните и во воннаставните активности што претставуваат посебен придонес за напредок и афирмација на Градот Скопје.
***
На 13 ноември пред 73 години борците од 42-та и 50-та Народноослободителна дивизија на македонската војска и 16-та Македонска бригада го ослободија Скопје од фашистичката окупација.
По неколкудневни тешки борби со припадниците на 22-та гренадирска германска дивизија, составена од 47-от и 65-от полк и делови од 11-та воздухопловна десантна дивизија, како и со германската тврдинска бригада „Ангермилер“ која беше распоредена пред Качаничката клисура, борците со победоносен марш влегоа во градот.