Со инсистирање на физичко присуство сакаме најмалку да наштетиме на физичкиот развој на учениците – додаде Петличковски
Се размислува во училиштата да се прави скрининг со брзи тестови, не се многу – имаме на располагање 20.000 тестови, на ученици по случаен избор за да ја видиме затапеноста на вирусот кај овие старосни групи, најави денеска новиот претседател на Комисијата за заштита на насeлението од заразни болести, д-р Александар Петличковски.
Тој појасни зошто предложиле наставата да се одвива со физичко присуство.
– Гледаме сега дека кај лицата од 8 до 12 години има ниска инциденца и затоа предложивме настава со физичко присуство и затоа инсистираме на примена на строгите протоколи во училиштата: проветрување, носење маски, изолација на симптоматските случаи. Со инсистирање на физичко присуство сакаме најмалку да наштетиме на физичкиот развој на учениците – додаде д-р Петличковски.
Одговарајќи на новинарско прашање, Петличковски рече дека брзите тестови имаат помала специфичност за детектирање на омикронот, отколку на делта сојот. Таа специфичност, како што рече, се движи некаде над 50 отсто и ќе бидат некако употребливи.
Петличковски потсети дека и со протоколите во моментов не се оди на изолирање на целото училиште, туку во изолација се ставаат оние кои се во непосредна близина на ученикот или студентот кој излегол позитивен.
– Тие одат во изолација, дури доколку немаат симптоми, и тестирање не се предлага. Се тестираат со PCR-тест само симптоматските пациенти.
(Љ.Б.)