Утре во 12 часот, во рамките на проектот “Галерија на отворено“ во централното подрачје на Прилеп, од страна на Општина Прилеп ќе биде поставена скулптурата „Две“ од македонскиот автор Александар Ефтимовски. Скулптурата е изработена од бел мермер, и е дел од 47-то издание на симпозиумот „Центар за современа ликовна уметност“ кој се одржува во Прилеп.
Досега преку проектот „Галерија на отворено“ се изложени дваесеттина скулптури од реномирани учесници на симпозиумот „Центар за современа ликовна уметност“.
Александар Ефтимовски е роден во 1988 година во Скопје. Своето академско образование го стекнува во Италија. Во 2010-та дипломирал на Академијата за ликовни уметности во Фиренца за скулптура и визуелна уметност, а потоа магистрирал на Aкадемијата за ликовни уметности во Карара и се посветува на обработка на камен.
Ефтимовски е добитник на неколку награди меѓу кои е и наградата за талентиран млад уметник од Министерството за култура на Р.М. Учесник е на бројни симпозиуми и групни изложби. Неговата самостојна изложба „Бело Злато – Метаморфоза“ веќе еден месец е поставена во галеријата „Кросовер арт галери“ во Минхен, Германија