Со портрет на истакнатиот македонски писател Јован Павловски, Друштвото на писателите на Македонија во четврток (1 јуни) во 12 часот, ќе ја одбележи 80-годишнината од неговото раѓање и 60 годишната творечка дејност. Средбата ќе ја отвори претседателот на ДПМ Веле Смилевски, а за творештвото на Павловски ќе зборуваат Лорета Георгиевска Јаковлева и Владимир Мартиновски. Стихови ќе чита Александра Велинова.
Како поет, раскажувач, романсиер, драмски автор, писател за деца и публицист Јован Павловски создаде богат и разновиден опус кој има свое значајно место во тековите на современата македонска литература. Дебитираше со стихозбирката „Август“ во 1962 година, а потоа објави низа поетски книги, меѓу кои: „Медеја“, „Идентитет“, „Ментален простор“, „Одработен страв“ и „Строгоста на живеењето“. Автор е на романите „Тоа Радиовце во кое паѓам длабоко“, „Сок од простата“, „Проверка на слободата“,„Град, години луѓе“ и други.
За своето дело Јован Павловски е добитник на врвни награди, меѓу кои: Рацоново признание, „Стале Попов“, Книжевно жезло за творечки опус, „13 Ноември“ на град Скопје, „Крсте Мисирков“, „Духовен воин“ и „Златно перо“. Неговото творештво е преведувано на 20 јазици во светот.