Досегашната в.д. директорка на Царинската управа, Славица Кутиров, е реизбрана за директорка на оваа државна институција. Според Кутиров, која е в.д. од август минатата година, реизборот е потврда за квалитетното менаџирање на Управата во претходниот период.
Таа нагласува дека Царинската управа е значајна институција која има високо ниво на усогласеност со регулативата и стандардите на ЕУ и во континуитет дава силна поддршка на бизнис секторот и легалната економија во целина.
– Како директор на Царинската управа, продолжувам во спроведување на сите законски надлежности и приоритетите за развој на институцијата. Во следниот период, целокупното работење го насочуваме кон реализацијата на повеќе проекти кои имаат цел да обезбедат поефикасна наплата на приходите и заштита на финансиските интереси и на општеството, олеснување на трговијата, пред се, преку понатамошна дигитализација на царинските и акцизните постапки и интеграција во регионот, како и понатамошна модернизација на ИКТ инфраструктурата и граничните премини. Во оваа насока, потенцирам дека работиме во специфични услови од аспект на пандемијата, која налага умешност во исполнување на активностите на Царината и непречена прекугранична размена на продукти за снабдување на граѓаните со потребните намирници, но и суровини за производство и извоз на компаниите, вели Кутиров.
Taa својата професионална кариера ја развива во Царинската управа повеќе од 20 години. Таа е и прв директор кој потекнува од институцијата, а доби мандат да ја извршува оваа функција во следниот период.