Јавен обвинител од Основното јавно обвинителство (ОЈО) Скопје донесе Наредба за спроведување на истражна постапка против 41-годишен словенечки државјанин кој е осомничен за кривичните дела – Неовластено производство и пуштање во промет на наркотични дроги, психотропни супстанции и прекурсори од член 215 став 1, како и Кражба од член 235 став 1 од Кривичниот законик.
„На 4 јули, пред спортскиот центар „Јане Сандански“, каде учествувал на Европско првенство за хип-хоп како тренер на група деца од Република Словенија, осомничениот забележал велосипед вреден 45.000 денари, кој бил потпрен на ѕидот и незаклучен. Осомничениот го одзел велосипедот и го скрил во грмушка во близина на кејот на Вардар. Откако завршил натпреварот, велосипедот го расклопил на три дела и го ставил во багажниот простор на автобусот со кој групата требало да се врати во Словенија“, се наведува во соопштението на Основното јавно обвинителство.
По пријавување на кражбата, бил легитимиран од полициски службеници кои извршиле претрес на осомничениот, при што во неговиот личен багаж пронашле две стаклени тегли и пластично кутивче со вкупно 13,57 грама марихуана, додаваат од ОЈО.
Бидејќи станува збор за странски државјанин без постојан престој во земјава, јавниот обвинител оцени дека постои очигледна опасност за бегство, како и можност тој да го повтори делото, па до судија на претходна постапка од Основниот кривичен суд Скопје достави предлог за определување мерка притвор.