„Наместо да видиме подобрување во време кога земјата се обидува да се приклучи на ЕУ, гледаме назадување“, вели Мајлс Смит, помошник-главен уредник на извештајот на ИРЕКС, во интервју за Гласот на Америка на македонски, осврнувајќи се на медиумската ситуација во Македонија.
Непрофитната организација ИРЕКС неодамна го издаде својот редовен годишен извештај – Индекс за одржливоста на медиумите во светот.
Според извештајот, Македонија е со оценка 1,54. По ова мерило, земјата спаѓа во втората категорија – земји со неодржлив, мешан медиумски систем.
Првата категорија е за земјите со нестабилни и неслободни медиуми, третата за оние со речиси одржливи, а четвртата за оние со одржливи. Извештајот се базира на тоа како новинарите опфатени со него гледаат на професијата.
„Резултатот за Македонија беше низок и тоа ни покажува песимизам меѓу македонските новинари за состојбата со слободата на медиумите, квалитетот на професијата, квалитетот на продуктот и за бизнис-состојбата во секторот“, наведува Смит.
Според него, словото на законот во Македонија гарантира слобода на изразување, но „кога сме кај спроведувањето на законот, често тој се користи да ги казни оние кои ќе ја пречекорат линијата на некој авторитет, политичар или бизнис- лидер“.
Во извештајот најниските оценки се во категориите професионално новинарство и менаџмент на медиумите.
Според мислењата на Смит, ниту една политичка фракција во Македонија значително не ја поддржува слободата на медумите, и, кога ја има власта, ја користи да ја замолкне критиката преку суптилна злоупотреба на законот.
„Загрижувачки е што имаме две фракции кои не се заинтересирани за вистински слободни медиуми. Тоа остава впечаток дека само новинарите и мала група од граѓанскиот сетор навистина се залагаат за слободата на говорот“, вели Мајлс Смит од ИРЕКС.