Македонските граѓани кои ќе патуваат на аџилак се изложуваат на ризик од смртоносниот вирус МЕРС кој владее во земјите од Блискиот Исток, порачуваат здравствените власти. Опасноста е поголема бидејќи не постои вакцина за овој вирус, а наскоро илјадници граѓани по празникот Рамазан Бајрам ќе заминат на аџилак во Саудиска Арабија.
-Не постои вакцина против вирусот МЕРС, граѓаните што патуваат во овие земји добиваат само вакцина против менингитис и задолжителна заштита против маларија. На луѓето кои патуваат таму им даваме препораки како да се заштитат, изјави за НОВА Лилјана Лазаревска раководител на одделот за епидемиологија во Центарот за јавно здравје во Скопје.
Лазаревска потенцира дека патниците кои се враќаат од овие земји задолжително подлежат на здравствени анализи, а досега немало ниту еден сомнителен случај. Сепак, со масовното патување на аџилак опасноста се зголемува. Македонските здравствени власти затоа предупредија на особена внимателност , а тоа значи граѓаните кои одат таму да не контактираат со лица кои покажуваат симптоми на грип, како што се висока температура, треска, кашлање и тешкотии при дишењето, бидејќи тие се карактеристични и за вирусот МЕРС. Највнимателни треба да бидат хронично болните.
„Особено оние со дијабетес и со тешки заболувања на белите дробови. Постари лица да не одат на аџилак, бидејќи доколку заболат потешко поминуваат за разлика од помладите. Хронично болните треба да се консултираат со матичен лекар, пред да одлучат дали ќе одат на аџилак или не“, изјави д-р Јованка Костовска од Министерството за здравство.
Нема опасност од ширење на вирусот во соседството бидејќи болеста беше откриена кај едно лице пред неколку недели.
„Станува збор за изолиран случај. Се работи за граѓанин кој бил на патување во Саудиска Арабија. Заболел таму, а не во Грција, но вирусот му го откриле кога се вратил“, потенцира д-р Костовска.
МЕРС е вирус со висок процент на смртност. Од 683 заразени лица, 204 починале. Најголемиот број, односно вкупно 600 од случаите се регистрирани во Саудиска Арабија. Во Европа пак, покрај во Грција, заболени има и во Германија, Италија, Холандија и во Англија. Сите заболени лица имале директна или индиректна врска со Блискиот Исток.
Оние кои во овој период планираат да патуваат таму, треба да избегнуваат контакт со камили, да не конзумираат месо што не е термички обработено, да купуваат безбедна вода за пиење и да одржуваат лична хигиена. Начините на пренесување на вирусот се`уште се анализираат.