Легендата на хип хоп музиката Снуп Дог ака Снуп Лајон (Snoop Dogg aka Snoop Lion) и „Блок Парти“ (Bloc Party), еден од најголемите светски бендови на инди-рок сцената, ќе настапат на главната сцена на Егзит фестивалот, што ќе се одржи од 11 до 14 јули во Нови Сад.
Денеc Снуп е еден од најпрепознатливите музичари во светот. Тој статус го заработи вешто комбинирајќи ја својата најголема љубов – рап музиката – со други музички стилови преку соработките со поп ѕвездите како што се Кети Пери (Katy Perry) и Алиша Кис (Alicia Keys)
Оваа година, Снуп Дог го создава неговиот нов лик. Старата фасцинација со Јамајка, како и новото име Снуп Лајон го најавуваат неговиот следен албум „Reincarnated“, но и документарниот филм кој го следи неговото патување по овој карипски остров.
По тој повод Снуп изјави: „Со овој албум сакам да испратам порака за љубов и да го насочам вниманието кон одличната музика создадена на овој прекрасен остров, чија намена отсекогаш била позитивно да го менува светот и има свој посебен живот“.
Посебен специјалитет на овогодинешниот фестивал ќе бидат „Блок Парти“ кои спаѓаат во елитата на современата глобална алтернативна рок култура. Настапот на харизматичниот Келе Окереке и неговиот инди-рок состав на овогодинешниот „Егзит“ фестивал ќе биде и нивниот премиерен настап пред публиката во регионот.