Околу 107 000 граѓани во април годинава останаа без правото на здравствено осигурување бидејќи не поднеле изјава за остварени приходи во Фондот за здравствено осигурување.
Голем дел од нив биле шокирани кога дознале дека не се здравствено осигурани, туку за тоа дознале кога им била потребна лекарска помош. Иако одлуката за доставување на изјава за приходи беше прогласена за неуставна во декември 2012 година, овие луѓе го изгубија правото на лекување, немаат право на ортопедски помагала шест месеци, а во исто време се изложија на можноста за да им бидат поднесени кривични пријави поради давање на лажни изјави пред Фондот. Станува збор за луѓе со ниски примања во семејството, кои се невработени.
– Ние бараме измени на Законот за придонеси, за задолжително социјално осигурување да не се поднесува изјава за укинување на обврската за приходи согласно одлуката на Уставен суд од декември 2012 година, изјави Несиме Салиоска РОМА СОС од Прилеп, организација која цело време апелира до Министерството за финансии да ја почитува одлуката на Уставниот суд.
Иако Уставниот суд се изјаснил дека одредбата е неуставна, таа е повторно е вратена во Законот, со што Собранието на најгруб начин ја ескивира уставната обврска за здравствено осигурување за сите граѓани и наместо да биде промотор на уставноста, Собранието го крши Уставот, предупредува Рената Дескоска професор на Правниот факултет.
– За жал кога нема политичка волја, нема можност во институциите да се спроведува и почитува Уставот. Во ваква ситуација има две можности: Одредбата повторно да се стави пред Уставен суд или граѓаните кои го изгубиле правото за здравствено осигурување своето право да го бараат на суд. Но, имајќи ја во предвид партизираноста на институциите и долгата рака на извршната власт не сум многу оптимист за остварување на правото и во двата случаи, изјави Дескоска.
Освен што одлуката е неуставна, поднесувањето на ваков документ за невработените е дополнителен трошок велат во оваа невладината организација. За да достават изјава тие треба да имаат лична карта, со нов датум венчаница, извод за родени, фотографии.
Трошоците за едно четиричлено семејство за да извадат некои од овие документи се околу 1000 денари, а тие земаат 2000 денари социјална помош, што е голем трошок за нив потенцираат од РОМА СОС.