Првата пратка од руската вакцина „Спутник В“ вчера пристигна во земјава. Пристигнати се 3000 дози, а вкупно нарачани се 200 илјади. Надлежните уверуваат дека вакцините се безбедни и ќе обезбедат континуитет на процесот на имунизација.
Први кои ќе се вакцинираат, согласно националниот план, се граѓани со хронични болести и луѓето сместени во старачките домови.
За начинот како ќе се одвива вакцинацијата, министерот за здравство Венко Филипче вчера при приемот на пратката објасни дека сите ќе бидат известени преку своите матични лекари и повикани на пунктовите кои ќе им бидат најблиску, додека во делот на старечките домови, вакцинирањето ќе се спроведе во домовите.
-Станува збор за вакцини кои што се различни во делот на вакцинацијата и ревакцинација, што значи дека сите овие дози ќе се користат за прва вакцина. Продложува процесот на имузација во доменот на здравствените работници и според индикацијата и на граѓани и онака како што е предвидено во националниот план за вакцинација, рече Филипче.
Вакцината „Спутник В“ е замрзнат раствор од 0,5 милилитри, за еден корисник, а ќе се чува во фржидерите во пунктот во „Јане Сандански“. Пратката е преземена преку службата на ДХЛ од Москва во Белград каде стигнале и одредени количини за Србија, заедно со овие 3000 за нас.
Во однос на тоа кога ќе пристигне втората пратка, Филипче посочи оти и руската компанија, како останатите, во однос на испораката е под голем притисок од сите земји во светот. Затоа, во текот на следните денови ќе се знае кога пристигнат останатите 200.000.
Од вакцината „Спутник В“ нема контраиндикации, уверува Филипче. Постои само препорака за претпазливост кај трудниците и доилките.
Сепак, до овој момент, за ниту една вакцина нема сериозна контраиндикација, ниту е регистриран некаков несакан ефект за време на клиничките студии и потоа, а тимот експерти ги прати буквално сите публикации.
Со Северна Македонија оваа вакцината е регистрирана во 46 земји во светот вклучувајќи неколку држави во Европската унија.