Во 11 часот продолжува собраниската седница, дванаесетта по ред, на која има две точки на дневниот ред: избор на претседател, заменик на претседателот, членови и нивни заменици на Комисијата за прашања на изборите и именувањата на Собранието на Република Македонија и избор на претседател на Собранието на Република Македонија.
На блокираната работа на Собранието денес реагираа СДСМ и Форумот на слободoумни патриоти.
“Република Македонија е парламентарна демократија. Постои парламемтарно мнозинство од 67 пратеници и тие имаат право и должност да ги изберат новиот собраниски претседател и новата Влада.
Парламентарното мнозинство е избрано од 700.000 граѓани на кредибилни избори. Тоа е претставник на народот. Не Никола Груевски. Не ВМРО-ДПМНЕ, кои се веќе опозиција.
Затоа пратениците на ВМРО-ДПМНЕ во Собранието се должни да обезбедат здрав разум и продолжување на демократските процеси, наместо да го бранат насилството на Груевски кое му треба за заштина на криминалите и од одговорност. Груевски не е фактор. Мнозинството граѓани се фактор”, вели СДСМ.
Форумот на слободоумни патриоти го осудува однесувањето на пратениците во Собранието:
“Вашето несовесно работење и однесување дополнително ја влошува и така лошата состојба во Република Македонија и ја продлабочува кризата. Од кога сте избрани прво неколку месеци ништо не работевте, земавте плата, за потоа со празни муабети, реплики и контра реплики да ги поминувате деновите во Собрание и повторно да земате плата.
Сакаме да ви укажеме дека додека вие безмилосно ги трошите народните пари во Собранието, надвор од него граѓаните имаат реални проблеми со блокираните институции и блокиран бизнис сектор.
Ве повикуваме веднаш да прекинете со вашите дворски игри и да овозможите Собранието непречено да функционира и да се стават институциите на државата во функција на народот, а не за ваши лични интереси!”, вели Форумот.