Познатата пијанистка Дуња Иванова вечерва во МОБ ќе одржи солистички концерт посветен на музиката за пијано на естонскиот авангарден композитор Арво Перт.
На програмата се дела кои прв пат ќе прозвучат на македонскиот концертен подиум, меѓу кои „За Алина“, „Варијации за закрепнувањето на Аринушка“, „Партита за пијано“, „Музика за детски театар“.
Иванова настапувала и во Њујорк и во Париз како и на фестивалите низ Балканот. Таа е магистар по пијано и докторант на Филозофскиот факултет во Скопје.
Значајни се рециталите посветени на музиката на Збигњев Прајснер, Филип Глас, Лудовико Инауди премиерно изведени на македонската музичка сцена.
Автор е на книгата „Естетско доживување на музиката“ и публикациите „Мултиапликативната примена на музиката во воспитно – образовниот процес кај децата“ и „Децата и музиката во виртуелната реалност“.
Концертот е поддржан од Министерството за култура и Македонската опера и балет.