24 годишната Слаѓана Влајковиќ со две малолетни деца талка по улиците. Непожелна во семејството, неприфатена од институциите поради долг кон мобилни оператори од шест илјади евра, мајката со двата сина викендов единствено на отворена врата наиде во Првата детска амбасада Меѓаши.
Невенчаниот сопруг и го свртел грбот, татко и не ја примал назад.
Слаѓана со партнерот живеела три и пол години во скопската населба Железара. Пред неколку месеци тој ја напуштил и заминал, а неговата мајка ги избркала снаата и внуците. На разбирање не наишла ни кај својот татко, ни кај маќеата. Добила само привремена помош и сместување кај роднини.
– Не ги сакам децата. Тоа беше образложените на мојот татко, кој ми рече да ги оставам децата во дом. Јас децата нема ги оставам – рече Влајковиќ на денешната прес-конференција изложувајќи ја пред јавноста својата судбина.
Со двете малолетни деца привремено престојувала кај братучетка, а неколкупати спиела и под отворено небо. Сега привремено е сместена во првата детска амбасада Меѓаши.
За случајот на Слаѓана, од Меѓаши го известиле Народниот правобранител, а поднеле барање за згрижување до центрите за социјална грижа, кризниот центар Надеж, студентските и средношколските домови, СОС детското село, шелтер центарите но никој не излегол во пресрет.
Од Меѓаши апелираат, државата да поведе сметка за социјалните случаи кои се жртви на институционалната нефункционалност. Проблемот на државата со овие граѓани според Меѓаши е во недостигот на социјални центри но и процедурата за сместување.
Жртвите на семејно насилство во институциите за згрижување може да се сместат од 24 до 48 часа што според Меѓаши не е решавање на проблемот.