Националниот совет за родова рамноправност (НСРР) ја искажува својата загриженост во врска со изјавата на државниот советник и претседател на Комисијата за заштита од дискриминација, г-дин Душко Миновски, дека зголемениот број разводи во земјата се резултат на еманципацијата на жените и нивната едукација.
Изјавата на г – динот Миновски ја сметаме и како признание за организациите кои активно работат во последните 20 години на унапредување на рамноправноста и еманципацијата на жените, сметаат од Националниот совет.
Врз основа на оваа изјава на претседателот на комисијата за заштита од дискриминација, НСРР ја повикува Владата да преземе итни и неодложни мерки за поголема еманципација и едукација на мажите со цел намалување на бројот на разводи во земјата.
Сметаме дека советувалиштата за семејство и брак кои ќе ги отвори Владата, во својата програма, треба да посветат посебно внимание на еманципирање на мажите и следење на трендовите на еманципираните жени. Воедно, ги повикуваме и сите засегнати мажи, кои се половина од популацијата, да го изразат својот став во однос на изјавата на г – дин Миновски.
НСРР ќе продолжи да работи на еманципација на мажите и жените во Република Македонија, да ја следи состојбата и доколку има потреба ќе поднесе претставка до Комисијата за заштита од дискриминација.