Најавија и испорачаа. Македонските ракометни надежи оставија срце на терен, со пресврт во второто полувреме го совладаа Алжир со 24:20 и закажаа средба со Франција во четврт-финалето на младинското Светско првенство. Дуелот со „триколорите“ е попладнево од 19,30 часот.
Филип Талески и Наим беа најефикасни играчи на натпреварот со осум погодоци. Палевски реализира четири, а по три во големиот успех на „црвено-жолтиот“ тим вградија Кузмановски, Шилегов и Велковски.
Три четвртини од натпреварот во „Хацене Харча“ арената мина во резултатски егал. Алжирците за еден гол (10:11) го решија во своја корист првото полувреме, а ништо поразлично не беше ниту во првата половина од продолжението по што почна „бегството“ на избраниците на Илија Темелковски. Талески нанижа три гола во македонската серија со 4:1 што добија на тежина и со неколкуте одбрани на Томовски за фрлање во очај на домашните и еден вид на навестување на гледалиштето во чија насока ќе оди завршницата.
Конечниот триумф дојде како последица на зацврстување на играта во дефанзива и навременото затворање на приодите кон голот. Алжир се потешко го наоѓаше патот до целта и се повеќе паѓаше под притисок од пораз за разлика од Македонија чии ракометари ја добија потребната самодоверба и со мудра игра го приведоа мечот до крај за комплетирање на големиот успех на северот на африканскиот континент.
Алжир – Македонија 20:24 (11:10)
Спортска сала: „Омниспорт Хацене Харча“ во Алжир. Гледачи: 10.000. Судии: Миклош Андорка и Роберт Хукер (двајцата од Унгарија).
Алжир: Кемичи, Гедбане (6 одбрани), Наим 8, Хелал 2, Коури 2, Ел Фреџ 1, Меклут, Бенмесуд, Ел Блида, Џедид 2, Хамад, Хаџ 2, Џема, Бентаиб, Џегаба, Абди 3. Селектор: Рабах Герби.
Седмерци: 2/5. Исклучувања: 2 минути.
Македонија: Томовски (4 одбрани), Даниловски (3 одбрани), Лазаревски 1, Димитриоски, Јагуриноски, Нелоски, Танкоски, Велковски 3, Шилегов 3, Петровски, Талески 8, Кузмановски 3, Крстевски, Џонов, Палевски 4, Арсеновски 2. Селектор: Илија Темелковски.
Седмерци: 1/3. Исклучувања: 4 минути.
СП во ракомет (У21) – Алжир/осминафинале
Резултати
Франција – Фарски Острови 28:25
Тунис – Исланд 28:27
Шпанија – Аргентина 27:21
Германија – Шведска 31:28 по продолженија (26:26 по 60 минути)
Хрватска – Русија 25:34
Унгарија – Словенија 26:25 по продолженија (21:21 по 60 минути)
Алжир – Македонија 20:24
Данска – Норвешка 34:27
Двојки за четврт-финале
Денеска играат
Данска – Русија (19,30 ч.)
Франција – Македонија (19.30 ч.)
Унгарија – Шпанија (19,30 ч.)
Германија – Тунис (19,30 ч.)