Спасовски: Нека е благословен и за многу години овој голем ден!

На овој велик ден кога ја чествуваме и Педесетница, слегувањето на Светиот дух на апостолите на педесеттиот ден од Неговото воскреснување, стаса и долгоочекуваниот глас на вистината по кој копнееше секој еден верник на нашата древна црква, Охридската Архиепископија, возобновена во лицето на Македонската Православна Црква, напиша меѓу другото на ФБ, министерот за внатрешни рабогти Оливер Спасовски кој како дел од владината делегација, присуствуваше на синодалната литургија во Фанар. Во написот стои:
Историски настан со кој се исправа долгата неправда над нашата Црква –официјално востановено е канонско единство и враќање на МПЦ-ОА меѓу православните цркви.
Дозволете да го искажам впечатокот од настан којшто се повторува после два и пол века, кога за последен пат сослужувале литургија Македонски Архиепископ и Вселенски Патријарх. Со голем пиетет присуствував на Патријаршиската и Синодална Света Литургија и В. Вечерна на Светиот Дух, заедничко сослужување на Неговата Сесветост Вселенскиот Патријарх Вартоломеј и Архиепископот Охридски и Македонски г.г. Стефан, како и на прием во Престолната сала во Патријаршискиот храм „Св. Ѓорѓија Победоносец”, во древниот Фанар.
Со многу молитви, храброст и мудрост до решение на долг и болен раскол. Почит и неизмерна благодарност до Неговата Сесветост Патријархот Вартоломеј, за честа и милоста со која сме удостоени со врачувањето на Синодалниот акт за востановувањето на литургиското општење со Великата Христова Црква , посебна благодарност и за братољубивата расположба на СПЦ за единството и евхаристичкото зближување преку взаемната почит.
Ова е голема радост за македонскиот народ, за сите православни верници кои со своите молитви, жртва и надеж, придонесоа за враќањето на христоносниот народ во Мајката Црква, за прогласувањето на МПЦ-ОА за канонска и валидна во сеправославниот свет.
Исконската љубов на верниот македонски народ е нераскинлив дел од македонскиот идентитет – живот раѓа низ вековите што одминале, ќе живее за навек.
Нека е благословен и за многу години овој голем ден!