Новиот министер за внатрешни работи, Оливер Спасовски при денешната посета а СВР Скопје, пред медиумите најави дека побарал инфорамции до каде се истрагите врз нападите на новинари како и за нападот на општина Центар.
– Се договоривме до понеделник на мое барање да се достават сите информации за нападите врз сите новинари во Скопје, зашто има сериозни напади, да видиме до каде е постапката и истрагата, да видиме исто така и во однос на нападот на општината Центар, изјави министерот.
>> Како „менаџираше“ Јанкулоска во случајот верниците против општина Центар
Тој рече дека во период кој следи, тој ќе изврши посета на сите подрачни единици на МВР во рамките на Македонија, за одблиску да се запознае со ситуацијата и процесите кои се водат во нив.
Во однос на известувањата на грчките медиуми дека мигранти се судриле со македонската полиција, министерот одговори дека енеска немало судир, иако ноќеска било тензично, со обиди да се помине оградата.
– Имаше оштетување на две места на оградата, има тензии на грчка територија помеѓу економските мигранти и бегалците. Ние како МВР со човечки ресурси сме подготвени да застанеме во одбрана на мирот во Македонија. Се надевам дека ќе се донесе добра одлука на ниво на ЕУ и врз основа на таа одлука заеднички да се реши проблемот, рече Спасовски.
Како што потенцираше тој, безбедносната состојба во Скопје е стабилна, а зголемените мерки на безбедност се превентивни за виталните објекти и дипломатско-конзуларните претставништва.
Одговарајќи на новинарско прашање, Спасовски рече дека засега истрагата со личните карти е во тек, дека треба да се остави простор за истата, и дека допрва ќе се утврдува дали личните карти доставени во МВР неодамна, биле искористени за изборни или некакви други цели.