Реагирајќи на пишувањата на некои од медиумите кои во јавноста важат за блиски до власта, дека сведокот на СЈО во случајот „Трезор“ веќе се знаел во Министерството за внатрешни работи, на денешната прес-конференција министерот Оливер Спасовски порача дека прашањето треба да биде упатено кон пратениците.
Како што вели тој, токму поради овој случај како и останатите сведоци, пратениците треба да ги донесат измените кои ги бара Специјалното јавно обвинителство.
– Тоа е прашање кое треба да се постави пред пратениците и мислам дека барањето од страна на Специјалното обвинителство да се направат измени во Законот за заштитени сведоци се реални бидејќи не само тој сведок туку и било кој друг сведок во било која постапка треба да биде сериозно заштитен заради тоа што дополнителна тежина претставува начинот на кој институциите се окупирани во Република Македонија, изјави Спасовски.
Тој ургира дека се потребни јасно дефинирани законски одредби и начела врз основа на кои ќе бидат заштитени сведоците а со цел Специјалното јавно обвинителство да има успешни постапки.
За случајот „Трезор“, веб-сајтот Курир пишува:
„Наши извори од МВР ни потврдија дека веќе целото Министерство гласно говори за идентитетот на сведокот и тој во разговор со колеги неофицијално им кажал дека во записникот од дадениот исказ никаде не стоело, ниту дека некој му наредил или му наложил било што. Напротив, неофицијално се дознава дека и кон него биле упатувани закани и уцени од типот „или си со нас или си против нас“, „ако не зборуваш како што треба, ќе завршиш како останатите“ или „помогни ни за да ти помогнеме“.
Претходно пак, специјалната обвинителка Катица Јанева, додека одговараше на прашањата на пратениците на Комисијата за политички систем и меѓуетнички односи за време на објаснувањето на вториот шест-месечен извештај во Собранието, порача дека потребни се измени во Законот за заштита на сведоците со цел да се решат индициите за криминал кои произлегоа од бомбите на лидерот на СДСМ, Зоран Заев.
Обвинителката Јанева бара сама да одлучува кој ќе биде заштитен сведок, наместо одлуката да ја носи Совет составен од повеќе луѓе, како што налага сегашниот закон.
СЈО бара овој Совет да го нема и само таа да ги знае информациите за тоа кој ќе стане заштитен сведок во постапките кои ги води обвинителството.
За одредено лице да биде вклучено во Програмата за заштитени сведоци, сега предлог поднесува Јавниот обвинител на РМ, врз основа на писмено барање добиено од надлежен јавен обвинител, судијата кој постапува по предметот или МВР.
Потоа одлучува Советот, а доколку за некој сведок треба да се продолжи програмата, повторно одлучува Советот на предлог на јавниот обвинител или раководителот на одделението.
Специјалното обвинителство смета дека премногу луѓе се вклучени во постапката за одредување заштитени сведоци, што може да доведе до протекување на информации за сведоците и загрозување на нивната безбедност.
Предлогот за измена на Законот за заштита на сведоци СЈО го побара уште во април.