Одлуката за да добиваат плата треба да помине на Управен одбор на ФЗОМ во петок и по завршување на административните работи, специјализантите ќе почнат да добиваат средства, потврдија за НОВА од Министерството за здравство
Обезбедени се финансиски средства за плати приватните специјализанти по стоматологија. Ова за НОВА го соопштија од Министерството за здравство, откако побаравме одговор зошто специјализантите не добиваат плата надоместок за нивниот труд иако пред три недели министерот Филипче вети дека пари ќе бидат обезбедени.
„Обезбедени се финансиски средства за специјализантите по стоматологија. На седница на Управен одбор на ФЗОМ во петок ќе помине одлуката за обезбедување надоместок и за оваа група на специјализанти. По завршување на административните работи, специјализантите ќе почнат да добиваат средства“, се вели во одговорот на Министерството за здравство.
Претходно во текот на денот, вкупно 43-ца специјализанти по стоматологија се обратија во НОВА револтирани дека плата немаат добиено иако министерот Филипче вети дека средствата за септември ќе ги добијат во октомври. Тие објаснија дека не им биле побарани податоци, ниту трансакциски сметки за да може да се реализира истата. Тие најавија дека доколку надлежните не им го исполнат ветувањето, од идната недела ќе штрајкуваат, се до исполнување на барањата.
„ Досега не сме добиле плата, ниту ни се побарани трансакциски сметки и други податоци за да може да се реализира тоа. Одлуката требаше да помине и на Управен одбор на ФЗОМ, но нема информација дека такво нешто се случило. Доколку не си го одржат ветувањето ние од идната недела ќе започнеме со штрајк се додека не бидат исполнети нашите барања“, изјавија утринава за НОВА специјализантите по стоматологија.
По ова, откако НОВА побара одговор, надлежните експресно донесоа одлука да се обезбедат средства за сите приватни специјализани по стоматологија.
На Стоматолошките клиники приватно специјализираат 43- ца стоматолози. Тие секојдневно ги извршуваат своите работни обврски со пациенти поради што бараат валоризација на нивниот труд, особено сега на почеток на новиот семестар и подмирување на трошоците за специјализација кон Стоматолошкиот Факултет – Скопје, кои се дополнителен товар на младиот специјализант.
Претходно, тие му испратија Oтворено писмо на премиерот Заев за кој велат дека им е последна надеж дека ќе го реши нивниот проблем за да имаат рамноправен, правичен и еднаков третман сите приватни специјализанти, а излегоа и на мирен протест пред Министерството з а здравство.