За време на церемонијата на откривањето на споменикот на Фрањо Туѓман во Сплит, полицијата уапси тројца членови и активисти на независната листа „Другото лице на Сплит“ поради развиорување на транспарент на кој пишуваше „Летај Туѓман, полетај“.
Транспарентот е парафраза на познатата сплитска песна „Летај галебе, полетај“.
Со овој чин независната листа на Драган Maрковин сакаше да го изрази незадоволството од подигнувањето на споменик на човекот кој „влијаеше на систематското уништување на градот во деведесеттите години, од што се нема опоравено до ден денес“.
„Со овој чин, ја изразуваме и нашата поддршка на обесправените бранители, чии права систематски се кршат и ние потсетуваме дека средствата за споменикот во ова време на криза можеше и требаше да бидат потрошени за решавање на статусот на овие луѓе“, се вели во соопштението на независната листа, кои собраа повеќе од 4.000 потписи од граѓаните против ваквото расфрлање пари во предизборието.
Независната листа „Другото лице на Сплит“ го осуди апсењето на тројца нивни членови и активисти кои беа спречени во мирниот протест, со цел да го свртат вниманието на уште еден обид за ставање на исто рамниште на жртвите со напаѓачите, а овој чин беше третиран како нарушување на јавниот ред и мир.
Тие очекуваат ослободување на уапсените без одлагање.
И покрај ова, градоначалникот на Сплит, Керум му се обрати на народот кој се собра околу споменикот:
„Драги пријатели го имаме Туѓман. Ова не е мој споменик, него вие го направивте. Туѓман е во Сплит поради вас. И за оние што им пречи, ако се обидат да го отстранат, повторно вие ќе бидите тука“.
Следниот споменик кој Керум започна да го поставува во Сплит е 10 метарски крст, чие монтирање вчера беше одложено поради лошите временски услови.
