Здруженијата на работниците во железницата повикаа штрајкови, запирајќи ги националните железнички услуги и метрото во Атина вчера, во знак на протест против условите за работа и, како што го опишаа како опасен неуспех за модернизација на железничкиот систем. Тие денеска повикаа и на втор 24-часовен штрајк.
Синдикатите, исто така, одржаа протест во четвртокот вечерта во Атина пред железничкиот оператор во земјата, Хеленик Трејн, како одговор на најсмртоносната железничка катастрофа во историјата на земјата.
Два одвоени протести во центарот на Атина одржаа левичарски групи, при што еден резултираше со судири меѓу младите кои фрлаа камења и полицијата. Митинзи се одржаа и во Солун и Лариса.
Критичарите го обвинуваат недостатокот на јавни инвестиции за време на длабоката финансиска криза што се протегаше во поголемиот дел од претходната деценија за железничката катастрофа.
Токму за време на кризата, во 2017 година, железничкиот оператор, кој тогаш силно губеше пари, беше приватизиран и купен од италијанската Ferrovie dello Stato Italiane Group.
Грција има ограничена железничка мрежа која не допира голем дел од земјата. И покрај долгогодишните проекти за модернизација, голем дел од клучните работи за контрола на шините сè уште се управуваат рачно.
Акцијата на спасувачите на местото на железничката несреќа кај месноста Темпи во Грција, продолжува и рано утрово, се очекува да заврши денеска, а паралелно во службата на судската медицина во Лариса, продолжува идентификацијата на жртвите.
Досега официјално се потврдени 57 загинати, а во болниците се хоспитализирани 48 патници, од кои шест се на одделите за интензивна нега.
Идентификација на жртвите се врши преку ДНК анализи, а според портпаролката на грчката полиција Константина Димолиду земени се 55 примероци од телата, 52 примероци од роднини на патниците и 26 примероци од пронајдените делови од човечки тела.
И речиси 60 часа по несреќата, не постои точна информација колку патници имало во возот.
Од компанијата „Hellenic train“ во средата соопштија дека во патничкиот воз се пренесувале „околу 350 патници“, неколку часа подоцна, портпаролот на Противпожарната служба рече дека имало 342 патници, десет членови на екипажот, а во товарниот имало две лица, а портпаролот на грчката Влада Јанис Иконому на вчерашниот редовен брифинг со новинарите објасни дека од повеќе причини тешко е да се знае точниот број на патници.
Прво, како што рече, поради тоа што не се сите билети со име и презиме, бидејќи не биле сите купени онлајн, а оние кои се од шалтер се без лични податоци.
И второ, бидејќи некои луѓе можеби се качиле во возот во последен момент.