Белград ќе се обиде, во соработка со ЕУ, да ја промени одлуката на приштинските институции за забраната на посетите на српските претставници во Косово за време на предизборната кампања, изјави претседателот на Србија, Томислав Николиќ.
Според Николиќ, доколку одлуката не се промени, Србија ќе размислува дали воопшто треба да учествува во преговорите со Косово.
„Белград ќе се обиде во соработка со ЕУ да оваа одлука на институциите на Приштина биде променета, а доколку не се промени, секако ќе седнеме да разговараме околу тоа дали треба да учествуваме во нешто што потполно и самостално ќе го спроведува администрацијата во Приштина“, изјави Николиќ пред новинарите во Стразбур по состанокот со претседателот на Парламентарното собрание на Советот на Европа, Жан-Клод Мињон.
Николиќ изјави дека одлуката Приштина ја донела на нерегуларен начин, и праша дали воопшто е можно одржување на избори без кампања.
„Тоа не е добро, ние поставивме поинакви односи помеѓу Белград и Приштина, односи на доверба, и мислевме дека изборите ќе бидат апсолутно демократски и регуларни. Сега се поставува прашањето околу регуларноста на изборите, со сите забелешки кои му ги пренесов и на Парламентарното собрание на Советот на Европа“, потенцираше тој.
Одлуката е конечна, изјави пак министерот за надворешни работи на Косово, Енвер Хоџај.
„Тоа нема да се промени, без разлика на притисокот кој Србија ќе го изврши пред Брисел. Ниеден претставник на Србија нема да може да влезе во Косово додека трае предизборната кампања“, изјави Хоџај, пренесува „Коха.нет“
Владата на Косово вчера го одби барањето на премиерот на Србија Ивица Дачиќ во петок да ја отвори предизборната кампања во Штрпац, на југот на Косово.