Мерките за економско опоравување ќе бидат тешки, бидејќи Србија е пред банкрот, предупреди денес вицепремиерот на Србија, Александар Вучиќ.
Потпретседателот на Владата на Србија најави намалување на платите во јавниот сектор со што ќе се заштедат меѓу 200 и 230 милиони евра, а пензиите ќе се зголемат со претходно утврдена динамика.
„Капитализам не значи дека државата треба да бара работа, туку да не го спречи оној кој ќе ја најде. Не сакаме никому да сервираме, тоа е работа на поединецот, а наше е да не ја скратиме можноста да лебот биде на дофат“, изјави Вучиќ за Телевизија Прва.
Воедно тој вели дека пензиите во Србија нема да бидат намалени.
– Пензиите нема да ги намалуваме, но ќе има намалувања на платите во јавниот сектор. Приватниот сектор што ја влече државата напред не може тоа да го издржи. Неможно е во приватниот сектор просечната плата да биде 34.000 динари, а во државниот 47.000 динари. Тоа го нема во ниту една држава во светот, потенцираше потпретседателот на српската влада.
Вучиќ најави дека до крајот на годината во Србија ќе има милијарда долари од кредит од ОАЕ од кои 500 милиони ќе се потрошат за враќање долгови, а 500 милиони вложени во стопанството „со најголема контрола“.
Според Вучиќ, неговата држава е „пред банкрот, во вистинска смисла“ и најави дека мерките за економско опоравување ќе бидат тешки, а не популистички. Со тие мерки според него, ќе бидат погодени меѓу 300.000 и 500.000 луѓе.