Во време кога во метроплотата никнуваат раскошни градби на само пет километри од центарот постои улица која со години стои неасфалтирана ,а граѓаните се дават во кал. Во улица „ПЕТ“ не влегуваат возилата за итна медицинска помош, таксистите, тука неможе да влезе ниту пожарникарско возило.
Иако платиле комуналии и сите други давачки кон општината Бутел, жителите на оваа населба сеуште чекаат општина да ја асфалтира улица. Ајла Саит има 32 години и поради неасфалтираната улица не е во можност да излезе надвор со нејзината инвалидска количка. Ајла е заробена во својот дом, неможе да оди на лекар, да се дружи со своите пријатели, да го види центарот на градот.
На оваа улица има уште четворица инвалиди и сите ја делат истата судбина со Ајла.
Жителите на улица „Пет“ велат дека кога ќе заврне дожд или снег, не се во можност да одат ниту до најблиската продавница. Летово избувнал пожар,а возилото одвај влегло од друга страна во последен момент, пред пламенот да ги зафати резервоарите со нафта.
Жителите на улицата велат дека се заложници на политиката. Наводно, еден од жителите на улицата, активен член на опозицијата е во лоши односи со градоначалникот Латиновски и сега велат дека од каприц не дозволува да се асфалтира улицата.
Од општината Бутел ги смируваат граѓаните. Велат дека иако буџетот е потрошен, нивната улица е ставена во план за асфалтирање. Се чекало само стручни лица да извршат проценка дали земјата е слегната по ставањето на фекалната канализација.
Жителите пак, стравуваат како ќе ја поминат и оваа зима во калта од која се гледаат и цевките од канализацијата кои се веќе оштетени од камионите кои го собираат сметот.