Повеќе од четири часа трае средбата на лидерите на четирите најголеми политички партии Груевски, Заев, Ахмети и Тачи со еврокомесарот Јоханес Хан во Пржино. На средбата присутни се евроамбасадорот Аиво Орав, амбасадорот на САД во земјaва -Џес Бејли како и белгискиот посредник во преговорите на работните групи на партиите, Питер Ван Хауте.
Се очекува потписниците на Договорот од Пржино да соопштат и финална одлука за датумот на избори, кој според Договорот би требало да се случат на 24. април.
Како што е веќе познато, премиерот Никола Груевски својата оставка ја денеска ја депонираше во Собранието со услов „сто дена пред избори“, а според извори на НОВА од преговорите до неговиот став избори да има на 24. април се држат и лидерите на албанските партии – Ахмети и Тачи. Тие сметаат дека има доволно време за создавање на фер услови за демократски избори во април.
За разлика од нив, како што неколку пати напомена Зоран Заев смета дека императив на Договорот од Пржино и понатаму остануваат точките за прочистување на Избирачкиот список и слободата за медиумите.
Се уште е неизвесно колку време ќе трае заедничката средба.
На средбата Заев присуствува со неговите сопартијци Радмила Шеќеринска, Петре Шилегов, Дамјан Манчевски, Рената Дескоска и Цветанка Ивановска.
Од владејачката партија присутни во Пржино се Зоран Ставрески, Никола Тодоров, Никола Попоски, Илија Димовски и Мартин Протоѓер.
Инаку, денешната посета на Хан во Скопје започна со поединечни средби со лидерите уште од изутринава.Тој напрво одржа средба со лидерот на СДСМ, потоа со премиерот во заминување Никола Груевски, по што следуваа одвоени средби и со Ахмети, а потоа и Тачи. Пред средбите Хан кусо изјави дека очекува оти ова ќе биде добар ден.