Министерот за надворешни работи Никола Попоски во Брисел се сретна со заменик претседателот на Владата и министер за надворешни работи на Грција, Евангелос Венизелос
Министерот за надворешни работи на Република Македонија, Никола Попоски, денес во Советот на Европската Унија во Брисел, оствари средба со грчкиот заменик претседател на Влада и министер за надворешни работи, Евангелос Венизелос.
На оваа прва средба меѓу двајцата министри беа разменети видувања за неколку значајни теми: перспективите за напредок во евроинтеграциите под тековното литванско и следното грчко претседавање со Европската Унија, изгледите за динамизирање на дијалогот околу разликата за името, перцепциите за различната политичка приоритетност на спорот во двете земји и ефектите од должничката и економската криза на билатерално и регионално ниво.
Притоа, министерот Попоски ги истакна заложбите за интензивирање на македонско-грчките односи, потребата од зголемена посветеност на политичко ниво на Атина и користа од отворен пристап и непречен проток за луѓето, бизнисите и идеите меѓу двете земји. Воедно, тој го истакна интересот за фокусиран дијалог на сите нивоа, особено на највисоко политичко ниво, за да се надмине единствената билатерална разлика.