Претседателот на Република Македонија, Ѓорге Иванов, денеска во Брдо кај Крањ, ќе учествува на средбата на лидерите од Брдо процесот, неформална иницијатива за соработка меѓу земјите од регионот во контекст на аспирациите за членство во евро-атлантските организации.
На средбата, на која ќе присуствува и францускиот претседател Франсоа Оланд, како и претставници на Европската унија, лидерите на државите од Брдо процесот ќе дебатираат за клучните проблеми и можностите на регионот за интеграција во ЕУ.
„Ветувањето на Европа е тука, дајте ни нам и на вас начин да го оствариме“, ова е пораката на францускиот претседател Франсоа Оланд кој денеска допатува во Брдо во Словенија на самитот на балканските шефови на држави. Ова е прво патување на француски претседател во Словенија од 1991 година.
Според францускиот дневник Ле Монд, оваа посета може да се чини излишна во овој момент кога Европа е соочена со повеќе кризи, но Оланд има намера да испрати сериозна порака до целиот Балкан, особено сега по влезот на Хрватска во ЕУ, дека портите на Европа се отворени за балканските нации кои мораат да одат кон помирување.