Српската компанија која изработува видео игри за мобилни платформи, „Нордеус“, ќе ги прошири своите операции во Македонија и во Ирска, изјави извршниот директор, Бранко Милутиновиќ за порталот за мобилни игри Покетгејмер.
– Следно ќе биде проширување на нашите операции во Даблин, Ирска и во Скопје, Македонија и ние активно бараме нови таленти – рече тој.
Најпозната игра на компанијата, која се игра преку Фејсбук и преку iOS и Android оперативните системи е социјалната фудбалска игра Top Eleven – Be a Football Manager, која сега има 11 милиони активни играчи.
Во периодот од три години откако играта е лансирана, таа има 40 милиони регистрирани играчи, од кои 25 отсто ја користат.
– „Нордеус“ е на врвот на индустријата на спортски игри и успехот со Top Eleven беше многу важен за нашиот раст и експанзија – вели Милутиновиќ.