Во тек е седница на која учествуваат претставниците на највисоките тела на Сојузот на синдикати на Македонија (ССМ) за тоа ќе има ли генерален штрајк.
Претседателот на Сојузот на синдикати на Македонија (ССМ), Дарко Димовски, по вчерашната двочасовна средба со владини претставници за линеарно зголемување на платите за 2.806 денари изјави дека нема договор со владата, но ќе има одлука за штрајк.
„Разочаран сум од преговорите со владините претставници. Не излегоа со конкретни предлози, одговор имаа за се, само за усогласување на платите немаа. Не бевме сфатени сериозно за нашите барања за линеарно зголемување на платите за 2.806 денари. Ценовните шокови и инфлацијата која е двоцифрена, нѝ даваат право да бараме усогласување на платите, бидејќи ова повеќе не се издржува, рече по средбата Димовски.
Вицепремиерот Фатмир Битиќи вели дека дијалогот во никој случај не е прекинат. На состанокот беше најавено формирање на работни групи кои ќе работат на дефинирање на моделот за плати кој ќе осигурува раст на платите на долг рок, но и методологија која ќе ја следи продуктивноста на вработените.
(Љ.Б.)