Европската унија е загрижена за ситуацијата на северот на Косово и многу внимателно го следи развојот на теренот, изјави денеска портпаролот на Европската комисија, Петер Стано, нагласувајќи дека ЕУ повикува на одговорност и намалување на тензиите.
Притоа Стано одговори на прашањата на новинарите, како и на барање на агенцијата Бета да се произнесе за изјавата на српската премиерка Ана Брнабиќ дека српските власти се блиску до одлуката за испраќање војска на Косово поради распоредувањето на косовската специјална полиција и заради заштита на српското население, врз основа на резолуцијата 1244 на ОН на Советот за безбедност.
Портпаролот на високиот претставник на ЕУ, Жозеп Борел, истакна дека тензијата мора да се намали пред се за доброто на локалното население во Косово и подвлече дека „мисиите ЕУЛЕКС и КФОР се на теренот вршејќи ја нивната улога како втора и трета безбедност и продолжуваат да патролираат и да ја следат ситуацијата“.
Стано ова го изјави како одговор на забелешката дека резолуцијата 1244 на Советот за безбедност на ОН е основа за мандатот на КФОР, како и како одговор на барањето да ја прокоментира изјавата на Брнабиќ дека властите во Приштина со испраќање специјална полиција на север ги прекршиле бриселскиот и кумановскиот договор.
Тој изјави дека „сега мора да се насочи вниманието кон нормализацијата на односите, што е од суштинско значење за европскиот пат на двете страни“.