Министерот за финансии Зоран Ставрески изрази уверување дека најавената инвестиција на индискиот бизнисмен Субрата Рој во Македонија ќе продолжи напречно и ќе стане реалност.
„Денешното соопштение го потврди она што претходно го кажавме, а тоа е дека инвестициите на Субрата Рој во Република Македонија непречено ќе продолжат. Ситуацијата таму е објаснета и дадени се сите детали“, изјави Ставрески.
Индискиот милионер најави изградба на монденски туристички центар на Охридското Езеро, кај Љубаниште. Покрај ова најави и изградба на споменик на Мајка Тереза во центарот на Скопје и вложување во земјоделскиот сектор на Македонија
Ставрески уверува и дека при реализација на проектот кај Љубаниште ќе бидат испочитувани сите законски и еколошки прописи и ќе бидат надоместени сите оние што имаат земјиште на делот каде треба да се реализира проектот.
„Владата ќе разговара со сите кои треба и ќе постапи согласно законските прописи во Македонија што се однесува на земјиштето што ќе биде од интерес за изградба на проектот во Љубаниште. Ќе бидат запазени сите законски услови, сите еколошки стандарди“, рече Ставрески.