Власта сака да влезе во Синдикатот и да постави свој човек за претседател кој ќе го води во наредните четири години, велат за НОВА во синдикатот на скопските клиники. Во синдикатот велат дека на клиниките веќе се лобира за абдоменалниот хирург Горан Беговиќ, преку кој партијата на власт се обидува да изврши влијание во оваа организација која минатата година штрајкуваше цели 52 дена.
Превирањата во синдикатот започнаа откако очниот хирург Дејан Ставриќ си даде отказ на оваа функција бидејќи замина да работи во приватна болница. Извори од синдикатот за НОВА велат дека веќе се подготвува предвремен Конгрес за избор на нов претседател, кој ќе с е одржи неколку месеци порано, а наводно се спрема и седница на Совет, за која никој не знае кога точно ќе се одржи.
За да ги провери информациите НОВА го контактираше хирургот Беговиќ, но тој само кратко прокоментира:
-Јас сум само член на Советот и не знам ништо, прашајте го претседателот на Советот, изјави кратко Беговиќ.
Доктор Беговиќ беше еден од лекарите кои штрајкуваа до крај, секој ден барајќи од министерот Тодоров поголеми плати и корекција на проектот „ Работа по учинок“ .
-Се уште не се знае ништо, не сме одлучиле кога точно ќе биде Конгресот, но веројатно ќе се одржи 1 до 2 месеци порано. Што ве чуди, промени мора да има, да се смени и статутот кој треба да се усогласи со законите. Но, прв човек мора да се избере бидејќи синдикатот не може да функционира без претседател, изјави за НОВА Ангелко Саздовски, претседател на Советот на синдикатот.
НОВА телефонски го контактираше досегашниот претседател Дејан Ставриќ, кој ви моментот е надвор од државата. Тој ги потврди информациите за превирањата и лобирањата за новиот кандидат за претседател на синдикатот.
-Точно е тоа што се случува во синдикатот. Очигледно на партијата на власт и се брза за да влезе во синдикатот преку него. Тој човек покажа партиско влијание иако беше дел од штрајкувачите, изјави за НОВА, Ставриќ.
Тој нагласи дека морал да даде отказ на функцијата претседател на синдикатот, но ингеренциите ги префрлил на претседателот и заменик претседателот на Советот за да може непречено да функционира синдикатот
-Ја си дадов отказ од функцијата бидејќи не е во ред да бидам претседател кога сум во друга работна организација. Но, сметам дека многу други членови од внатрешноста кои беа меѓу штрајкувачите се позаслужни и треба да се кандидираат за ова место отколку од овој кандидат за кого се лобира во моментот, рече Ставриќ.
Синдикатот на Клиничкиот блок има 3800 членови не само од скопските клиники туку од здравствените установи од цела Македонија. Иако не успеа до крај да ги реализира барањата, синдикатот изврши силно влијание преку штрајкот, а штрајкувачкиот одбор и организаторите станаа трн во око на актуелната власт.