Фотографија и видео: Фокус
Апсењето на Дејан Ставриќ не ги поколеба неговите соборци, во петокот на само еден ден пред судењето да го прослават изборот на новиот синдикален лидер Горан Беговиќ. Изборот на единствениот кандидат кој го замени Ставриќ бил во хотелот „Полин“ во Дојран. Околу 3000 евра биле платени од сметката на Синдикатот за престојот на сите 120 кандидати кои присуствувале на Конгресот, потврди за НОВА новиот претседател Беговиќ.
Членовите во Дојран пристигнале со автобуси, а во хотелот имале обезбедено спиење со појадок. Беговиќ рече дека почнале со ручек и завршиле со ручек во Етно село. Таму го прославиле изборот на новиот претседател, а се забавувале со песните на Адријана Алачки. Претходно имале туристичка посета и на манастирот Лесново.
-Хотелот во Дојран ни даде попуст од 20 проценти. Можам да кажам дека штедевме годинава, потрошивме најмалку што можевме, за разлика од претходните години кога се трошеле по 7-8 илјади евра, а се останувало цел викенд, изјави за НОВА Беговиќ.
Конгресот се најавуваше со недели претходно, откако Ставриќ си замина од лидерското место и замина да работи во приватна болница. Но, не се кажуваше точниот датум кога ќе се одржи со образложение дека ниту во Синдикатот не знаат кога ќе се одржи. Извори за НОВА велат дека на членовите за одржувањето на Конгресот им било кажано два дена порано, односно во средата. Неофицијално, некои од членовите на Советот не сакале да присуствуваат, а некои наводно не биле поканети.
Гласањето пак, било јавно, со кревање рака, а биле присутни нешто повеќе од 40 делегати, потврди Беговиќ.
Што се однесува до апсењето на нивниот колега и доскорешен лидер, во Синдикатот велат дека застануваат зад Ставриќ со финансиска, морална и правна помош доколку е потребно.
-Апсолутно сум против апсењето кое беше изведено спектакуларно и на тој начин пренесено во медиумите. Во останатиот, судскиот дел не можам да се мешам. Но, ние му даваме целосна подршка на Ставриќ како наш колега и поранешен лидер на Синдикатот на клиниките, изјави Беговиќ.
Вчера, познатиот очен хирург Дејан Ставриќ беше пуштен во домашен притвор. Тој во понеделникот на 26 мај беше осуден на една година затвор и прогласен за виновен за сторено кривично дело примање на награда за противзаконито влијание. Стариоќ на судењето рече дека ова е мнотиран процес и најави борба во своја одбрана преку судскиот систем, а доколу треба и во странство.