Стотици стечајни работници од цела Македонија и активисти од движењата „Ленка“ и „Солидарност“ денеска на протест во Скопје, под засилено полициско обезбедување.
Откако премиерот Никола Груевски им вети дека се ослободени од плаќање на радиодифузна такса, денеска во МРТВ претставникот на стечајците Лилјана Георгиевска побара одговор зошто сметките се уште им се наплаќаат. Но, во МРТВ никој не сакаше да ги прими стечајците на разговор.
„Се е ова лажен изборен маркентинг, извршителите ни симнуваат пари од сметки не гледајќи дали се тоа пари испратени од роднини или од социјална помош“, рече Георгиевска и најави социјални немири доколу не се реши нивниот проблем.
Како што најавија организаторите, протестот започна пред зградата на Македонска телевизија и продолжи пред седиштето на Сојуз на синдикатите на Македонија (ССМ), а ќе заврши пред Влада на Македонија.
Стечајците и денеска ќе се обидат да имаат средба лидерот на ССМ Живко Митревски, кој на последниот протест во февруари одби да има средба со нив и се јави со соопштение повикувајќи се на новите законски одредби.
„Ги повикуваме и останатите граѓани да се приклучат кон протестот на некогашните работници кои делеле од своја уста со цел младите генерации да имаат бесплатно образование и здравство, а денес се заборавени од државата која ја граделе. Нивната борба е и наша борба. Денес тие се стечајни работници утре можеш да бидеш и ти! Да се спротивставиме заедно против неправдата која им е нанесена“, велат од „Солидарност“ и од „Ленка“.