Откако градоначалникот Андреј Жерновски денеска обзнани дека скулпторката Валентина Стефановска била дури 25 пати во Фиренца на трошок на општината, таа за НОВА вели дека освен со општинскиот буџет, таму патувала и на сопствен трошок.
-На сопствен трошок со кола заминав многупати. Имав и потпишано договор со Oпштината, дека во таков случај Oпштината нема да ми го плати престојот, вели Стефановска.
Стефановска вели дека е точно дека во Италија патувала и на товар на Oпштина Центар за да врши надзор над спомениците кои ги правела.
-Не се сеќавам колку пати бев во Фиренца. Во случаите кога одев со авион тие трошоци беа покриени од страна на општината, но таа не располага со сумите, ” бидејќи целиот аранжман на патувањата одеше преку нив”, вели Стефановска.
Освен Стефановска која заминала 25 пати во Фиренца, според пресметките на новото раководство во Италија биле вкупно 257 лица на товар на Општина Центар за поблиску да се запознаат со условите каде ќе се леат спомениците од проектот Скопје 2014.
Освен Стефановска, според Жерновски во Италија 8 пати патувал и поранешниот претседател на Советот, Владимир Здравев, како и екс-раководителот на Секторот урбанизам и екс-раководителката за јавни набавки.