Точно е дека го удрив лекарот неколку пати но, тој се однесуваше со мене многу дрско, ме истурка од собата каде што лежеше мајка ми, а јас само сакав да бидам покрај за да не ја извади иглата повторно бидејќи беше во агонија. Вака ја започна својата приказна Филип Стојановски, 35 годишен човек кој сам се јави во редакцијата на НОВА и призна дека го удрил лекарот на Клиниката за гастро, а потоа отишол и сам се пријавил во полициска станица. Неговата мајка починала денеска како последица од малигното заболување од кое страдала две години.
-Бевме многу револтирани бидејќи во амбулантата два часа ја чекавме лекарката, ни рекоа дека нема кревет, а немаше и количка за да ја носиме. По два часа, наместо лекарката дојде лекарот А.Р кој ми се обрати со зборовите :„Излези надвор!“ Јас го прашав зошто да излезам бидејќи во собата немаше медицинска сестра, сакав да помогнам, а тој ми одговори :„За ќеиф!“ Во тој момент ми се затемни пред очите и почнав да го удирам, изјави за НОВА Стојановски.
Тој потоа отишол во полициска станица и сам се пријавил, но вели дека неговиот татко и тетка му биле задржани од обезбедувањето и во подрумот на Интерните клиники биле малтретирани.
-Татко ми кој има пет бајпаси во срцето бил тепан од обезбедувањето, го удирале по главата, му ги свиткале рацете и го терале да ме пронајде. Подоца добив закани и по живот од лекарот. Мислам дека некој се обидува работата да ја сврти на национална основа, изјави Стојановски.
Веднаш по настанот Стојановски поднел претставка до Министерството за здравство.
.jpg)
НОВА контактираше и со лекарот А.Р кој побара неговото име да не биде спомнувано во јавност. Тој случајот го пријавил во полициска станица, а најверојатно ќе поднесе и приватна тужба против Стојановски.
-Мислев дека синот на пациентката ќе ме праша нешто, но тој ме удри толку силно три пати од двете страни на главата што јас паднав и колабирав. Да не дојдеше обезбедувањето кој знае што ќе се случеше со мене. Навистина за ништо не бев виновен, изјави нападнатиот лекар за НОВА.
Тој веднаш бил однесен во Ургентниот центар каде што му била укажана лекарска помош.
Како што НОВА веќе објави двајцата директори на Клиниката забраниле да се даваат било какви информации за случајот да не излезе во јавност.