Директорот на Градската општа болница „8 Септември“ ги потврдува случувањата во прислушуваните разговори кои ги објави опозицијата, за кои вели дека се случиле во ноември 2011-та година, но вели дека не може да ја потврди автентичноста на разговорите бидејќи не учествувал во нив.
„Јас не можам да ја коментирам автентичноста на разговорите бидејќи не сум учевствувал во нив, но случувањата за кои зборувате се одвиваа во ноември 2011-та година. Во тој период ми требаа петтмина инжењери и јас лично бев на разговор кај премиерот Груевски кој ми рече „ако ги имате примете ги “. Ние примивме тројца информатичари и еден енергетичар бидејќи на конкурсот не се јави никој за местото електроничар“ изјави за НОВА, директорот Стојчев.
Од друга страна, во еден од телефонските разговори Јанкуловска изразува незадоволство од неговата работа бидејќи, како што рече не ги почитувал насоките за партиските вработувања.
Стојчев не сакаше да го коментира разговорот на министерката Јанкуловска со нејзиниот сопруг Влатко Илиевски во кој таа вели „Директорот мора да почитува тоа што сме му дале насоки, туку си прима кого сака и нормално вика дека има дозвола од премерот. Тој е тешко ѓубре“.
„Нема да го коментирам разговорот на министерката. Ние примавме луѓе што ги исполнуваат условите за работа“, рече Стојчев.
Што се однесува до приемот на 30-те медицински сестри кои требало да бидат вработени, Стојчев вели дека болницата распишала конкурс, но работата се растегнала што веројатно предизвикало незадоволство кај власта.
„Ме прашаа што е работата, но не сум добил партиски списоци. Немав добиено ниту насоки за вработувањата, како што се вели во прислушуваниот разговор. Изборот за прием го направи комисија од болницата која процени дека предност имаат волонтерите, односно тие што ги исполнуваат условите на конкурсот и кои што работеле најмалку една година како волонтери“ изјави Стојчев.
Еве ги разговорите кои ги објави опозицијата, а кои се однесуваат на прием на партиски вработувања во болницата „8 Септември“.
11.Разговор помеѓу Гордана Јанкулоска и Никола Груевски
НГ: Горде здраво
ГЈ: Здраво
НГ: Ааа со овој зборев од воена…
ГЈ: Аха
НГ: Ми го објасни следното, дека ако ги прими тие нашите 5, 3 ми се чини одделенија нема да му функционираат бидејќи нема доволен број на лекари специјалисти . Го прашав кој му се имињата на тие што он сака да ги прима, ми ги даде и ми укажа дека скоро за сите има некаква ургенција поддршка и така натаму од наши или видни…
ГЈ: Функционери…
НГ: Фукционери или и од самите комитети. Па со обзир дека ми личи дека му држат аргументите дека нема да му функционираат, со намера сум а се консултирав и со Зоран, се согласи да му го предложам следното: да ги прими он сега нашите што се од листата…
ГЈ: Такаа, а за овие…
НГ: А по изборите да му дадеме согласност и за oвие 5…
ГЈ: Јас да ви кажам претседателе пошо у Тетово сум више ви ја напишав пораката, у таа насока дека ќе ги решиме и неговите мислам…
12.Разговор помеѓу Гордана Јанкулоска и Влатко Илиевски
ГЈ: Ало
ВИ:Ало?
ВИ: Абе види сакав да те прашам во врска со овие нови вработувања во Градска болница има околу 30-тина сестри не знам колку инженери коишто се запрени…
ГЈ: Добро…
ВИ:…во Агенција. И Стојче од кај тебе ии од здравство збореле не знам вчера-завчера
ГЈ: Да…
ВИ: И што е сега крајната одлука?
ГЈ: Директорот мора да почитува тоа што сме му дале насоки… он си прима кого сака…
ВИ: Добро тоа ме интересираше, значи не ги почитува, тој рече дека ги почитувал…
ГЈ: Не е точно… значи он и кај докторите си ги прими он шо си ги сакаше луѓето, сеа пак си бута свои кој му текне вака непотистички …
ВИ: Добро…
ГЈ: И нормално вика ја за тоа имам дозвола од премиерот
ВИ: Добро тогаш…
ГЈ: Тој е тешко ѓубре е тој чоек…
ВИ: Добро…а шо поминале, мислам шо биле избрани тоа ќе има проблеми?
ГЈ: Ама тоа тој нека си најде начин да го поништи…ние му даваме еден список он си бира кого сака и вика е сега е завршено изброт е завршен…
ВИ: Мхм
ГЈ: По мене опцијата е или да најде начин да го испочитува списокот што ние сме му го дале или да го смениме него нека влезат неговите на работа па следниот директор ќе почитува..