Странска консултанска куќа ќе врши ревизија на тендерот за изградба на новиот Клинички центар, дознава НОВА од извори упатени во оваа проблематика. Експертите од консултанската куќа треба да утврдат каде е најдобро да се изгради Клиничкиот центар, дали локацијата во кругот на клиниките е соодветна и која локација одговара за ваков грандиозен објект.
За оваа цел Европска централна банката и доделила грант од 2,1 милиони евра, неповратни средства на државата. Информацијата за НОВА, ја потврди и министерот за здравство во заминување, Арбен Таравари. Тој рече дека ревизијата која треба да ја направи консултаската куќа е по негово барање, а банката за таа цел одобрила грант.
„Да, точно е дека ќе се избере консултанска куќа и тоа со високи стандарди, со стручњаци кои ќе треба да направат анализа на тендерската документација и да одлучат каде е најдобро да се изгради новиот Клинички центар. Ако проценат дека може да се гради во кругот на клиниките ќе остане тука, ако не ќе кажат која локација е најдобра за ваков објект“, изјави за НОВА, Таравари.
Кога дојде на функцијата Таравари најави дека новиот Клинички центар нема да се гради на просторот кој беше планиран на местото на старата зграда на Клиниката за гинекологија, туку на сосема друга локација надвор од градот и од сообраќајните гужви. Како идејата тој посочи простор некаде околу обиколницата.
За да не се отстапи од договорот со банката, Таравари предложи на местото каде што претходната власт планираше да го гради Клиничкииот центар, да биде изграден мал Дијагностички центар со лаборатории. Подоцна, најверојатно излезе дека оваа идеја не е во согласност со договорот и банката одлучи да додели грант за експертите да направат стручна анализа што може да се направи и каде треба да се гради Клиничкиот центар.
Претходната власт за изградбата на новиот Клинички центар се задолжи со кредит од 90 милиони евра, а почетокот на изградбата беше најавен уште на 2 јануари 2014 година. И покрај официјалниот старт на изградбата кога се сечеа црвени ленти на местото каде што беше предвидено да се гради новиот објект(на просторот каде што беше старата гинекологија), три и пол години стои само дупка.