На сослушувањето пред регулаторот СЕБИ во Мумбаи, Индија, милијардерот Субрата Рој изјавил дека неговиот имот достигнува едвај милион долари. Ова го јавуваат индиските медиуми, а написите ги пренесува “Утрински весник” во утрешното издание. На сослушувањето Рој изјавил дека тој и сопругата поседувале накит вреден околу 600.000 долари, депозити во вредност од 300.000 долари и 70.000 долари во кеш.
-Тоа е се што имам, рекол Субрата Рој по сослушувањето.
Сослушувањето доаѓа откако регулаторот СЕБИ го замрзна сиот имор на компанијата во сопственост на Рој, Сахара Груп, како и личниот имот на милијардерот и дел од директорите во компанијата. Претходно СЕБИ и наложи на компанијата да врати околу 4 милијарди долари на измамени граѓани. Долгот требаше да се врати на три рати, но имаше само една уплата.
Субрата Рој треба да инвестира и во Македонија, на брегот на охридското езеро каде со за околу стотина милиони долари е најавено дека ќе гради казина и хотели. Субрата Рој беше дочекан од целата македонска влада, а милијардерот дури најави дека ќе гради и споменик на Мајка Тереза во Скопје. Кога се обелодени во јавноста дека Субрата Рој должи многу пари во Индија и дека неговиот имот е замрзнат, македонската влада уверуваше дека тие лично разговарале со Рој и тој им пренел дека инвестиција ќе има без разлика на случајот кој против него се води во Индија. Вицепремиерот Зоран Ставревски изјави дека не е загрижен поради спорот во Индија и дека тоа било проблем на друга држава, а него, односно владата единствено ја интересирале потезите на Субрата Рој во земјава.