Се прават обиди во текот на денот на Никола Груевски да му се достави решението од Кривичниот совет дека жалбите му се одбиени и дека треба да се пријави на издржување затворска казна во Шутка, велат од Судот за НОВА. Груевски и денеска не бил достапен да го прими решението.
Дали и кога ќе биде побарано стражарно приведување на Груевски зависи од судијата за извршување на санкции, објаснуваат судски извори.
Во меѓувреме, од затворот Шутка го известиле Судот дека поранешниот премиер Никола Груевски не се појавил доброволно во законски предвидениот рок.
Според законската процедура, МВР може да асистира само ако добие известување од Судот дека не може да го најде осуденото лице, по што се распишува потерница.
Од МВР велат дека до нив не стигнало вакво известување од Судот.
Од Судот соопштија дека до крајот на работниот ден ќе информираат за исходот од последниот нивен обид за врачување на решението и за натамошните постапки во однос на Груевски.
Кривичниот совет на Одделението за организиран криминал и корупција при Основниот суд Скопје 1 ги одби во петокот жалбите на Груевски и неговите адвокати и го потврди решението на судијата за извршување санкции со кое поранешниот премиер треба да се јави во затворот за издржување двегодишна казна за предметот „Тенк“.