Планот за судењето на тројцата менаџери на унгарскиот Маѓар Телеком, објавен од Јужниот окружен суд во Њујорк, предвидува започнување на процесот на 1 октомври, додека изнесувањето на доказите да трае до 31 јануари 2015 година.
Експертските мислења и извештаи ќе може да се изнесуваат до крајот на мај 2015 година.
Судијата Ричард Саливан, кој го води процесот против менаџерите Елек Штрауб, Андраш Балог и Тамас Морваи реши процесот да се води пред порота.
Претходно беше одбиена и втората жалба на адвокатите на тројцата обвинети, кои со судска процедура на поднесување жалба за текот на судењето, сакаа повторно да го избегнат процесот.
Според судијата Саливан, во случајот на македонскиот Телеком, тројцата унгарски менаџери се обвинети дека се обиделе да ги измамат и американските власти, и поради тоа останува првичната одлука на судот дека е надлежен да продолжи со процесот.
– Обвинетите во случајот против Штрауб и другите, организирале коруптивна шема насочена кон македонската Влада и притоа потпишале лажно наведувачки документи пред ревизорите на нивната компанија, како и лажни поднесоци до американската Комисија за хартии од вредност, пишува во меморандумот подготвен од судијата Саливан во понеделникот.
Штрауб Балог и Морваи се обвинети дека во 2005 година им дале мито на политичари од Владата на Република Македонија, за да го попречат отворањето на македонскиот телекомуникациски пазар за конкуренција, со што се обезбедила доминантната положба на Македонски Телекомуникации и екстра профит на компанијата преку повисоки цени.
Случајот се води во САД поради тоа што Маѓар Телеком котира на њујоршката берза и мора да поднесе извештај до американската Комисија за хартии од вредност, при што секое криминално дејство може да се смета како обид за мамење и на американските инвеститори во компанијата.