Специјалните сили на грчката полиција се судриле со демонстрантите во саботата навечер пред зградата на поранешната државна телевизија ЕРТ во предградието на Атина, јавуваат медиумите повикувајќи се на полициски извори.
Полицијата морала да употреби солзавец за да и одврати поранешните вработени во државната радио-телевизија ЕРТ да влезат во зградата на радиото, од каде што беа евакуирани ноќта кон четвртокот, а при обидот на група луѓе да навлезат во објектот избиле мали судири.
Најбројни биле приврзаници на главната опозициска партија коалицијата на радикалната левица Сириза и на малата популистичка партија Независни Грци, кој сакале да го пробија полицискиот кордон кој е поставен од 7. ноември пред зградата на ЕРТ.
Претходно во саботата навечер во текот на парламентарната расправа по предлогот за гласање недоверба на владата на Антонис Самарас што во четвртокот го поднесе Сириза, лидерот на опозицијата Алексис Ципрас од парламентарната говорница ја обвини полицијата дека ги растерала пратениците на Сириза кои сакале да влезат во просториите на ЕРТ.
Притоа биле повредени тројца пратеници, меѓу кои и Зоја Константопулу. Тие веќе трет ден се обидуваат да се пробијат во зградата на ЕРТ, но полицијата ги спречува во намерата.
Министерот за јавен ред, Димитрис Стаматис, ги негираше обвиненијата.
-Според нашите информации, немало никаков напад врз пратениците. Тоа што се случи, беше насилен обид за влез на пратениците заедно со група поранешни вработени во зградата на ЕРТ. Ние нема да дозволиме повторни да биде окупирана зградата на радиото. Тоа е државен имот, рекол министерот.
Според атинските медиуми, избиле и помали судири меѓу отпуштените вработени од поранешната ЕРТи техничкиот персонал на новата јавна телевизија ДТ кои полицијата се обидела да ги внесе во зградата на радиото.