Основниот суд Скопје 1 пред чии простории денеска протестираа новинарите од различни редакции и бараа укинување на мерката притвор за колегата Томислав Кежаровски, попладнево упати соопштение до новинарите, служејќи се со квалификации како „такаранечен иницијативен одбор“, „такараначени слободи на изразувања“ и ги обвини новинарите дека „вршат притисок“ врз судот и дека прават „упад“ во неговото независно функционирање.
-Најостро реагираме на вака воспоставената медиумска пракса за вршење притисок врз судот од страна на поединци и групи кои на овој начин злоупотребувајќи го медиумскиот простор преку таканаречени форми на слобода на изразување го изразуваат незадоволството од очекуваниот тек на постапката, па со оваа цел, преку различни „иницијативни одбори“ и други интересни групи, со организирање на протести пред судот ставајќи се над законот и уставот на Република Македонија која има долгогодишна демократија и преку своите институции, а особено преку судската власт ги гарантира човековите права и слободи.
Со ваквото постапување од поединци и групи се прави упад во независното функционирање на судскиот систем и примена на законите, се загрозува правниот поредок и правната еднаквост на граѓаните, вели Судот.
Понатаму во соопштението судот информира дека „новинарот бил само еден од обвинетите“, а мерката притвор била „законито определена“ и не пропуштаат повторно да нагласат дека новинарите им вршеле постојан притисок.
-Со ваквите постојани притисоци од страна на таканаречениот Иницијативен одбор кој континуирано се вршат во изминатиот период преку најразлични форми, обвинетиот новинар се става во привилегирана позиција во однос на останатите обвинети за кои исто така е определена мерка притвор, при што на овој начин се злоупотребува позицијата што истиот извршувал дејност новинар за да се прикаже во јавноста дека во Република Македонија се ускратуваат правата на слобода на изразување, соопштува Основен суд 1.