Годинава која изминува светот нема да ја памети по најдоброто. Во 2015 се случија неколку катастрофи, а помеѓу нив најдлабоко врежани ќе останат крвопролевањата во Сирија и ескалацијата на бегалската криза, како и терористичките напади во Париз.
Милиони луѓе ги напуштија своите руинирани домови бегајќи од бомбардирањата во Сирија, Авганистан и Ирак и безмилосниот масакар на терористичката организација која себе си се нарече „Исламска држава“ (ИСИС). На судбината на овие бегалци – за кои светот има поделени мислења бидејќи едни ги гледаат со сожалување додека други ги сметаат за опасност – ќе остане да се решава и во наредната 2016 година.
Вечерта на 13 ноември Европа ја потресе веста за тероризмот кој се случи во срцето на континентот, во главниот град на Франција, Париз. Во овие координирани напади загинаа околу 130 луѓе а речиси 360 беа повредени од кои стотина сериозно ранети.
Сите светски медиуми со голема будност ја следеа потрагата по овие терористи и истрагите на полицијата кои се одвиваа не само во Франција туку и во Белгија, Германија и Швајцарија.
Истрагата се уште во тек. Белгија во последните денови уапси десетина лица кои се осомничени за поврзаност со атентатите а полицијата се уште трага по Абделслам по кој е распишана меѓународна потерница, ден по напади во Париз.
Поради заканата од терористички напади, денес во големите европски престолнини Новата 2016 година се пречекува со засилени мерки на безбедност. Во Брисел беше откажан огнометот а во Париз низ улиците е предвидено зајакнато присуство на војската.
Годинава Турција и Русија ги заострија односите по соборувањето на рускиот воен авион.
САД и Куба по над 50 години пак, ги нормализираа односите, а Хозе Кабањас е првиот кубански амбасадор во САД по толку долго време замрзанти односи помеѓу двете земји.
Светот загуби и некои значајни имиња од светот на политиката, музиката и филмот, а помеѓу нив и Б.Б Кинг, Демис Русос, Леонард Нимој, Омар Шариф и други. Во пензија заминаа или ја најавија помеѓу другите, легендарниот водител Дејвид Летерман по 33 години на телевизиските екрани, како и НБА легендата Коби Брајант по речиси 20 години во кошарката.
Папата Францис ја објави својата прва песна и најави албум.
Балканот од друга страна загуби многу значајни имиња. Животот заврши за Кемал Монтено, кој почина на 66 години, Влада Дивљан („Идоли“), Арсен Дедиќ, како и Ранко Жеравица, кошаркарскиот тренер со кој Југославија го освои Светското Првенство во 1970 година и Олимписките игри во Москва во 1980 година.
На Балканот се случуваа големи протести во Подгорица, Грција ја мина цела 2015 година во финансиска криза и транзиција, Хрватска ја доби првата жена претседател. Приказната за ова подрачје од светот е долга, а некои од земјите во 2016 година ќе се соочат со позитивните и негативните последици на нивните кризи.