Светската банка ја зголеми прогнозата за растот на македонската економија за годинава од 1 отсто, колку што беше проекцијата во декември лани на 1,4 отсто во најновото јунско издание на својот главен полугодишен извештај „Глобални економски изгледи“.
Сепак, ова ниво на проектиран економски раст, иако зголемено, е најниско споредено со другите меѓународни финансиски институции, како и далеку пониско од проекциите на македонската влада и централната банка.
Минатиот месец Европската банка за обнова и развој ја намали проекцијата за раст на македонската економија од 1,8 на 1,5 отсто. Европската комисија, пак, една недела пред ЕБОР, исто превиде раст од 1,5 отсто за македонската економија, а меѓу овие две прогнози се појави и онаа на Народната банка на Македонија, која беше далеку пооптимистичка и изнесуваше 2,2 отсто.
Така што, оваа нагорна проекција на Светската банка од 1 на 1,4 отсто се сообразува со проценките на ЕБОР и Европската комисија, кои сега проектираат раст од 1,5 отсто. Инаку, минатата проекција на Светската банка беше донесена во декември кога во Македонија траеше буџетската криза во Парламентот, а проекциите за 2012 година беа под нулата.
Актуелната проекција на СБ за Македонија е пониска само од онаа за Црна Гора со 0,8 отсто и на Бугарија со 1,2 отсто. Сите други земји во регионов имаат повисоки проекции за економскиот раст: Албанија со 1,8 отсто, Косово со 3,1 отсто, Србија со 2 отсто и Романија со 1,7 отсто.
Проекциите за глобалниот раст за годинава се 2,2 отсто, а за 2014 предвиден е раст од 3 отсто. На ниво на еврозоната проекциите се пониски, при што за годинава се предвидува пад од 0,6 отсто, а за идната година раст од само 0,9 отсто.
Проекциите за раст за 2014 година за Македонија изнесуваат 2,5 отсто, а за 2015 година 3,5 отсто.