Престрелката во училиштето во Врачар, во која, како што потврдија од МВР на Србија, загинаа осум ученици и еден чувар, додека седум лица се ранети, е тема на светските медиуми.
Скај њуз објави дека девет лица загинале, осум ученици и еден чувар, откако седмоодделенец отворил оган врз своите врсници.
Си-Ен-Ен се повикува и на N1 и го пренесува соопштението на МВР на Србија дека сите расположливи патроли веднаш излегле на терен и го привеле осомничениот малолетник, ученик од седмо одделение, кој, како што се сомнева, испукал неколку истрели од пиштолот на неговиот татко во правец на учениците и обезбедувањето на ова училиште.
Британски Мирор, повикувајќи се на српското Министерство за внатрешни работи, пренесува дека неколку деца се повредени, а еден чувар е убиен откако момчето му го украло пиштолот на татко му и отворило оган кон своите врсници во Србија.
Полицијата излегла на лице место каде пронашла 14-годишно момче со оружје во рака.
Тој, наводно, отворил оган за време на часот по историја, погодувајќи неколку врсници, персонал од обезбедувањето и една наставничка, се вели во првичните извештаи.
Ја пренесуваат и изјавата на ученичката која рече дека кога ги слушнала звуците помислила дека некој фрла петарди во училницата, како и изјавата на таткото на Милан Милошевиќ, која ја дал на телевизијата Н1.
Мирор додава дека масовните убиства се многу ретки во Србија, но дека експертите упорно предупредувале за оружјето што останало во земјата по војните во 90-тите години и за постојаните економски проблеми кои можат да бидат поттик за вакви ситуации.
Би-Би-Си, исто така, истакнува дека масовните пукања се ретки во Србија, која има многу строги закони, но дека бројот на луѓе кои поседуваат оружје е еден од највисоките во Европа, со 39,1 на 100 луѓе, според извештајот од 2019 година.
Оттаму додаваат дека истрагата е во тек.