Откупувачницата за злато „Голд Ексчејнџ“ таинствено исчезна од Македонија. Станува збор за фирма која имала 12 дуќани, од кои шест во Скопје и исто толку во другите градови во внатрешноста. На вратите од дуќаните на фирмата повеќе од една недела стои натпис дека вршат попис, но всушност е затворена. Сопственикот го изнел последното злато од 2,4 килограми во вредност од 57 000 евра, а на вработените им останал должен две неисплатени плати потврдија за НОВА во Министерството за економија. Од информациите кои во Министерството ги добиле од вработените, се дознава дека на нив им било соопштено дека фирмата се продава и затоа се повлекува од Македонија.
– Вчера управителката на фирмата подигнала пари од сметката, но не се појавила во Државниот инспекторат каде што беше повикана на разговор, изјави за НОВА Илир Шабани, раководител на секторот за меѓународна трговска соработка во Министерството за економија.
И сопствeникот и управителката на фирмата се Хрватски државјани. Во фирмата имало околу 20 вработени, кои останаа на улица. Локациите на дуќаните на оваа фирма беа сконцентрирани во централното градско подрачје, каде што кириите се многу високи. Од Министертвото за економија претпоствуваат деке се работи за истата фирма која во Србија исчезна одеднаш и затвори 73 дуќани, на вработените не им исплатиле две плати, а со себе однеле 1,7 милиони евра од откупеното злато на граѓаните на Србија.
Македонското Министерство за економија веднаш ја повлекло дозволата на фирмата „Голд Ексчејнџ“ која откупеното злато од граѓаните го извезувала во Австрија.