Претседателите на САД и Русија, Доналд Трамп и Владимир Путин, имале уште еден разговор на самиот Г20 во Хамбург, за кој досега јавноста не беше запознаена, потврдил извор од Белата куќа кој потенцирал дека се работи за краток разговор. Изворот не објаснил што е разговарано на таа средба за која јавноста не беше информирана, објави Ројтерс.
По средбата на почетокот на самиот Г20 и билатералната двочасовна средба на 7.јули, двајцата претседатели се сретнале и последниот ден од самиот, за време на вечерата.
„Беше тоа вечера за сите двојки на Г20. Пред крајот на вечерата претседателот разговараше со Путин“, рекол изворот од Белата куќа.
Оваа вест веднаш ги поттикна прашањата за содржината на разговорот, за лицата кои биле присутни и причината поради која не било објавено дека имало уште еден разговор.
Од Белата куќа не соопштиле детали од краток разговор кон крајот на вечерата.
„Инсинуациите дека Белата куќа се обидела да го сокрие вториот разговор се лажни, злонамерни и апсурдни“, рекол изворот од Белата куќа.
На Твитер се огласи и американскиот претседател Доналд Трамп.
„Лажната приказна за тајната вечера нема врска со вистината. Сите членови на Г20 и нивните партнери беа поканети од германската канцеларка. Медиумите тоа го знаеја“, напишал Трамп.
Американско-руските односи се под лупа на јавноста поради обвинувањата дека Русите биле вмешани во претседателската кампања на Трамп.